БНСУ-ын Хүний эрхийн Үндэсний Комисс Монгол Улсад ажиллаж байна

БНСУ-ын Хүний эрхийн Үндэсний Комисс болон Монгол Улсын Хүний эрхийн Үндэсний Комисс хамтын ажиллагаагаа өргөжүүлэх зорилгоор 2025.06.20-нд харилцан ойлголцлын санамж бичиг байгуулсан. Санамж бичгийн хүрээнд Монгол Улсын Хүний эрхийн Үндэсний Комисс, тус улсын хил дээрээс буцсан иргэдийнхээ эрхийг хамгаалах чиглэлд үйл ажиллагаа явуулж байгаа бол БНСУ-ын ХЭҮК-оос Монгол Улс дахь албан болон албан бус боловсролын тогтолцоонд хүний эрхийн боловсрол олгож буй эрх зүйн орчин, нөхцөл байдалтай танилцах, санал, туршлага солилцох зорилгоор хүрэлцэн ирээд байна.  

Энэхүү ажлын хэсэгт БНСУ-ын ХЭҮК-ын Хүний эрхийн боловсролын хэлтсийн дэд дарга, хатагтай Пэк Инэ болон мэргэжилтэн Жон Ынёонг, Ким Жүүхий, Канг Мижеонг нар багтсан бөгөөд өнөөдөр /2025.10.14/ Монгол Улсын Хүний эрхийн Үндэсний Комисст ажиллаж хамтарсан уулзалт зохион байгууллаа. 

Энэ үеэр ХЭҮК-ын дарга Д.Сүнжид, Монгол Улсад хүрэлцэн ирж хүний эрхийн боловсрол олгож буй үйл явц, эрх зүйн орчинтой биечлэн танилцаж байгаад талархал илэрхийлж, ижил чиг үүрэг хэрэгжүүлдэг түнш байгууллагуудын хувьд мэдлэг, туршлагаасаа харамгүй хуваалцсан үр дүнтэй уулзалт зохион байгуулахыг хүсэв. Мөн уулзалтад ХЭҮК-ын Судалгаа, дүн шинжилгээний хэлтсийн дарга бөгөөд Тамгын газрын даргын албан үүргийг түр орлон гүйцэтгэгч С.Тунгалагтамир, Хүний эрхийн боловсролын хэлтсийн дарга Х.Цэцгээ, Гомдол, хяналт шалгалтын хэлтсийн дарга Г.Ууганбаатар, Олон талт хамтын ажиллагааны хэлтсийн дарга У.Ундрах, ахлах мэргэжилтэн Ч.Амарбаясгалан болон Хүний эрхийн боловсролын хэлтсийн албан хаагчид оролцов.

ХЭҮК хүний эрхийн боловсролын бодлого, тулгамдаж буй асуудалд дүн шинжилгээ хийж энэ талаар Монгол Улс дахь хүний эрх, эрх чөлөөний байдлын талаарх 2007, 2015, 2019 оны илтгэлд тусгаж, албан болон албан бус боловсролын тогтолцоонд хүний эрхийн боловсрол олгох үйл ажиллагааны чанар, үр дүнг сайжруулах тухай санал, зөвлөмжийг Улсын Их Хуралд хүргүүлсэн.

“Монголын Эмнэсти интернэшнл” ТББ-тай хамтран Хүний эрхийн боловсролын симпозиумыг 4 удаа зохион байгуулж байна. Симпозиумын үр дүнд гарсан санал, зөвлөмжийг үндэслэн Засгын газрын хэрэг эрхлэх газар, Боловсролын яам, Хууль зүй дотоод хэргийн яам Сангийн яам, их дээд сургууль, Хуульчдын холбоо зэрэг холбогдох байгууллагуудад Комиссын зөвлөмжийг хүргүүлж хэрэгжилтийг ханган ажиллаж байна.

Түүнчлэн Комисс байгуулагдсан цагаас эхлэн нийслэл, 21 аймгийн төр, хувийн хэвшлийн байгууллагын ажилтан, албан хаагч, оюутан залуус, ерөнхий боловсролын сургуулийн сурагчид, иргэний нийгмийн байгууллагын гишүүд, иргэд олон нийтийн хүний эрхийн мэдлэг, ойлголтыг нэмэгдүүлэх, хүний эрхийн мэдрэмжтэй, хүний эрхэд суурилсан хандлага арга зүйг үйл ажиллагаанд нь төлөвшүүлэх, хүний эрхийн соёлыг төлөвшүүлэх зорилгоор 4650 удаагийн 13304 цагийн сургалтад 259799 оролцогчийг хамруулсан талаар танилцуулсан юм. Мөн оролцогчдын асуултад хариулж, харилцан мэдээлэл солилцлоо.

Хөтөлбөрийн дагуу БНСУ-ын ХЭҮК-ын төлөөлөгчид маргааш Боловсрол, шинжлэх ухааны яам, Боловсролын судалгааны үнддэсний хүрээлэн, “Монголын Эмнести интернэшнл” төрийн бус байгууллагатай уулзалт зохион байгуулах юм.