Хөшигийн хөндийн шинэ нисэх онгоцны буудлаас шуурхай автобус иргэдэд үйлчилж байна

Дэлхийн олон хотод нэвтэрсэн буухиа буюу шуурхай автобусны үйлчилгээг “Улаанбаатар Эйрпорт Шаттл” ХХК Монголд нэвтрүүлээд багагүй хугацаа өнгөрч байна. Хөшигийн хөндийд “Чингис хаан” олон улсын нисэх онгоцны шинэ буудал ашиглалтад орсноор тус үйлчилгээг нэвтрүүлжээ. Шинэ нисэх онгоцны буудлыг зорьж буй  болон нисэх буудлаас хот орох зорчигчдод тусгай чиглэлийн, шуурхай үйлчилгээний том болон дунд оврын автобусаар үйлчилгээ үзүүлэх юм. Ингэхдээ “Шангри-Ла”, “Блю Скай”,  “Ибис Стайлс Улаанбаатар” /ibis Styles Ulaanbaatar Hotel/, “Баянгол”, “Чингис”, “Рамада”, “Туушин”, “Кемпински”  зэрэг томоохон 10 зочид буудал руу зорчигчдыг тээвэрлэх аж. Түүнчлэн  үйлчилгээний соёл, техникийн бэлэн байдал, аюулгүй найдвартай ажиллагаа, зам тээврийн хөдөлгөөний соёлыг хэвшүүлж, олон улсын стандартын хэрэгжилтийг ханган ажиллаж байгаа юм байна. “Улаанбаатар Эйрпорт Шаттл” ХХК нь төр, хувийн хэвшлийн түншлэлийн хүрээнд нийслэлийн өмчит “Улаанбаатар хотын хөгжлийн корпораци” ХК болон “Монголын үндэсний бүтээн байгуулалтын нэгдэл” ХХК-ийн хамтран хэрэгжүүлж буй “Шинэ нисэх буудлын зорчигч тээвэрлэх /тусгай чиглэлийн, шуурхай үйлчилгээний том болон дунд оврын  автобус үйлчилгээ ­­­төсөл”-ийн хэрэгжүүлэгч юм.