Хүчирхийлэгч охид хохирогч охиныг дахин дарамталжээ

Монгол охин БНСУ-д 14-16 насны дөрвөн охинд зодуулж, хүчирхийлэлд өртсөн хэрэг 2021 оны 7 дугаар сарын 3-ны өдөр гарчээ. Харин энэ талаар мэдээлэл 12 дугаар сарын 1-ний өдөр Солонгосын томоохон хэвлэл мэдээллийн хэрэгслүүдээр цацагдаж эхэлсэн юм. Тус хэрэгтэй холбоотойгоор Өмнөд Солонгосын ерөнхийлөгчид гомдол гаргах сайтад хохирогчийг зодож, гэмтээсэн охидод хариуцлага тооцож, нүүр царайг нь ил болгохыг шаардаж одоогоор 98877 хүн санал өгөөд байна. Энэ санал 300 мянгад хүрвэл хэргийг тус улсын ерөнхийлөгчийн зүгээс яаралтай анхааралдаа авдаг юм байна. Доор хаягаар нэвтэрч саналаа өгөх боломжтой. https://www1.president.go.kr/petitions/Temp/P7m674 Солонгос улс дахь Монголчуудын эрх ашгийг хамгаалах төрийн бус байгууллагаас 13 настай охин зодуулсан хэргийг шийдвэрлэхэд оролцоо үзүүлэх үүднээс тухайн охины ар гэрт очиж, уулзаж нөхцөл байдлыг олон нийтэд хүргэхэд дэмжиж ажиллаж байгаа юм. Тэдний өгсөн мэдээллээр хүчирхийлэгч охидын нэг хохирогч охин руу хараал хэлж, худал ярилаа гэх зэргээр мессэж илгээж дарамт шахалт учруулсан байна. Солонгос улс дахь Монголчуудын эрх ашгийг хамгаалах төрийн бус  байгууллага охинд өмгөөлөгч авч өгөх, хуулийн туслалцаа үзүүлэх дэмжлэг үзүүлэх чиглэлээр ажиллаж байгаа юм байна.